केसांचे प्रकार - परिणाम आणि उपाय

केसांचा विचार करताना ते स्पर्शाला कसे आहेत आणि त्याची जाडी उंची किती आहे यावर त्याचा पोत ठरतो. केस धुतल्यावर ५ ते ६ तासांनी त्यांचे परीक्षण करता येते. आणि त्याचा प्रकार कळतो.

कोरडे केस (Dry Hairs)

या केसामध्ये तेलग्रंथी अल्पप्रमाणात तयार होतात असतात. वाढत्या वयानुसार केशवर्धक द्रव्यनिर्मितीचे प्रमाण मंदावल्याने केस कोरडे पडतात. तसेच सतत उन्हात फिरणे , कंडिशनवरचा वापर न करणे यामुळेही केस कोरडे पडतात. कोरडे केस हे जाड असतात. यात फाटे लवकर फुटतात. या केसांची मुळे घट्ट असतात मात्र ते जास्त ठिसूळ असतात. त्यामुळे ते मधेच तुटतात. लवकर कोंडा होतो. नेहमी विस्कटल्यासारखे दिसतात. लवकर गुंता होतो. या प्रकारच्या केसांना चमक नसते ते साधारणतः भुरकट तपकिरी रंगाचे असतात. यात फाट्यांचे प्रमाण जास्त प्रमाणात असतात. हे केस एकमेकांपासून सहजपणे वेगळे होतात. स्पर्शाला ते चरचरीत असतात. हे केस कुरळे असू शकतात.

उपाय -

कोरडे केस आठवड्यातून किमान दोनदा धुतले पाहिजेत.
केस धुण्याआधी एक दिवस कोमट तेल लावून हेडमसाज करावा . त्यामुळे केसांच्या मुळांना तेल मिळते आणि कोरड्या पेशीनिर्मितीची क्रिया खुंटते.
केस धुताना सौम्य शॅम्पूचा वापर करावा.
केस धुताना प्रत्येकवेळी कंडिशनर लावावे.
मेहेंदी डाय महिन्यातून एकदाच करावे. कारण मेहेन्दी डाय केल्याने केस कोरडे होतात. नंतर २ दिवस केसांना भरपूर तेल लावावे.

तेलकट केस (Oily Hairs)

तारुण्यात आणि सर्वच वयात होणारे हार्मोन्समध्ये बदल तसेच जास्त तेलकट खाणे यामुळे केसामध्ये तेलकटपणा आढळतो. तेलकट केस हे सरळ आणि लांब असतात हे केस एकमेकांना चिकटलेले असतात. काहीवेळेस केसांमध्ये तेलकटपणा जास्त असल्याने चेहराही तेलकट दिसतो. हे केस काळेभोर असतात. स्पर्शाला ते मऊ असतात. ते एकमेकांपासून सहज वेगळे होत नाहीत. जास्त सिल्की असल्यामुळे कंगव्याने त्यांना योग्य आकार द्यावा लागतो.

उपाय -

तेलकट केस आठवड्यातून किमान चारवेळा धुतले पाहिजेत.
केस लेमन शाम्पूने धुवावे.
तेलकट , तळलेले , चरबीयुक्त पदार्थ खाणे टाळावे.
केस धुताना प्रत्येकवेळी कंडिशनर लावावे.
केसांमध्ये खूप तेल लावू नये .
केस धुण्यापूर्वी एक तास अगोदर हेड मसाज करावा.

मिश्र केस (Combination Hairs)

मिश्र केस हे तेलकट आणि कोरडे या दोन्ही प्रकारात आढळतात. केसांना शॅम्पू केल्यानंतर २ दिवस कोरडे असतात आणि नंतर ते तेलकट होतात. केसांना शॅम्पू केल्यानंतर लगेच मऊ लागतात २ दिवसांनी चरचरीत लागतात. तीव्र शाम्पूने धुतल्यास केसांची टोके खराब होतात. आणि जास्त प्रमाणात फाटे फुटतात. केसांची योग्य काळजी न घेणे. संतुलित आहार न घेणे.प्रखर उन्हात जाणे यामुळे या प्रकारातील केस लवकर खराब होतात.

उपाय -

केस धुताना शॅम्पू आणि पाणी एकत्र करून लावावे.
नियमित कंडिशनर वापरावे.
१५-२० दिवसांनी मेहेंदी लावावी मेहेंदी डाय करताना त्यात अंडी एकत्र करावी.
केस आठवड्यातून किमान तीनवेळा धुतले पाहिजेत.
केस धुण्यापूर्वी ५ तास अगोदर हेड मसाज करावा.
प्रखर सूर्यकिरणे केसांवर पडू नयेत याची काळजी घ्यावी.

सर्वसाधारण केस (General Hairs)

याप्रकारच्या केसांमध्ये कुठल्याही शाम्पूचा वाईट परिणाम होत नाही. हे केस स्पर्शाला मऊ असून त्यात चमक असते. हे केस अतितेलकट किंवा अति कोरडे नसतात. फाटे शक्यतो नसतात.